Eth Conselhèr de Cultura, Lluís Puig, realizèc eth 31 d’agost era sua prumèra visita oficiau ara Val d’Aran coma Conselhèr dera Generalitat.

Siguec recebut en Les, en un prumèr acte institucionau en quau visitèc er emplaçament deth qu’en ostiu der an que ven serà eth Centre d’Interpretacion des Hèstes deth Huec e Musèu der Haro. Aguest centre se plaçarà en antic edifici dera crasta dera Plaça der Haro, damb ues vistes magnifiques ath monument.

Era visita contunhèc ena Casa deth Senhor d’Arròs, sedença der Archiu Generau dera Val d’Aran, a on dempús de signar eth libre d’aunor, eth Conselhèr podec veir eth document que constituís eth dret istoric d’Aran, era Querimònia. Pendent aguesta visita, eth Conselhèr podèc conéisher era situacion de manca d’espaci que comence a víuer aguest edifici.

Dempús der Archiu, eth Conselhèr, acompanhat peth Sindic d’Aran, Carlos Barrera, e d’autes autoritats araneses, visitèc eth Musèu Etnologic dera Val d’Aran, a on s’hèc era presentacion deth pè de batiadera romanica deth sègle XII- XIII dera glèisa de Santa Maria de Mijaran, cedit peth Depòsit dera Colleccion Nacionau d’Art dera Generalitat. 

Entà acabar, eth Conselhèr se desplacèc enquiara sedença der Institut d’Estudis Aranesi- Academia Aranesa dera Lengua Occitana, a on estèc arrecebut pes membres d’aguesta institucion.

Aguesta siguec ua visita qu’eth madeish Sindic qualifiquèc de tranquillizadora, tant entath present coma entath futur, pr’amor que dèishe clares es intencions dera Generalitat de contunhar defensant era cultura e eth patrimòni d’Aran.