“Ereus dera tèrra”, atau ei coma se cride eth nau libre de Paco Boya, escrit en aranés, que dejà a estat presentat dauant dera atenta guardada de desenes de persones. Er acte compdèc damb era participacion de figures arreconeishudes en país peth sòn prètzhèt en çò que tanh ara lengua e ath territòri d’Aran.

Atau, era istoriana Elisa Ros, eth mèstre Frederic Vergés, o eth tecnic en torisme Alberto López, i preneren part entre d’auti. Intervencions que serviren tà introdusir idèes claus que se tracten en eth nau libre de Paco Boya.

Un recuelh de passatges imprescindibles pes que a passat eth nòste país, qu’a requerit de fòrça trabalh documentau.

E precisament un des elements tractadi siguec eth dera evolucion dera configuracion deth paisatge aranés. Un ahèr restacat damb era incipient pèrta deth mestièr dera pagesia, damb eth respectiu abandonament dera gestion dera montanha.

Pendent era serada tanben se hèc referéncia a un aute des rèptes qu’era societat aranesa a peth dauant: eth d’escríuer ena lengua deth país. Quauquarren que, en tot coincidir damb era Diada de Sant Jòrdi, resòne mès que jamès.

Coma principau ei tanben era reflexion ara qu’“Ereus dera tèrra” mos convide: cavilhar enes rèptes de futur d’Aran sense desbrembar es caushigades deth passat. Un libre que dejà se pòt aquerir enes principaus libreries deth país.