Coma cada 8 de seteme, Vielha a celebrat eth sòn dia gran dera sua Hèsta damb era processon enquiara glèisa de Santa Maria de Mijaran e era tradicionau missa. Grana expectacion en un dia en que toti es vesins de Vielha e participaires an estat cridadi a vestir de gala.

Dempús dera missa, s’a pujat en tot caminar enquiara plaça dera Glèisa, en centre de Vielha, tà arrecéber ara Còlha de Santa Maria de Mijaran, qu’enguan a complit 45 ans, e as Fradins de Vielha. En un dia tan especiau, aguesti dus grops de balhs aranesi de Vielha an barat amassa un recuelh de cançons emblematiques deth país.

E çò de mès estonant a estat eth recòrd batut: e ei que s’artenhec que mès de 120 parelhes, ei a díder, mès de 240 persones, barèssen era populara "Giga" ath madeish temps. Ua marca istorica ena Val d’Aran que se sajarà de superar de cara ar an que ven.

Eth programa des hèstes s’acabarà de completar damb era net tematica, qu’enguan anime as participaires a disfrassar-se damb quauquarren restacat damb eth mon mitologic. E tanpòc cau desmbrembar-se dera Baishada deth Cap dera Vila que se celebrarà ath londeman dera net tematica.