Eth Pla de Beret a tornat a èster un an mès er epicèntre esportiu dera Val d’Aran damb era celebracion dera 39au Marxa Beret d’esquí de hons. Lèu 850 hondistes an prenut part d’aguesta competicion que cada an artenh un gran exit de participacion de hondistes nacionaus e d’Euròpa, en un marc incomparable coma ei eth circuit de hons de Beret. Coma ja ei costum, era corsa s’a desvolopat en 3 distàncies: 10, 21 e 42 kms, en tot arribar es dues darrères ath pòble de Montgarri. Ena categoria de 10 kms, es guanhadors an estat es catalans Maria Sellés e Jaume Pueyo. Ena distància de 21 kms, es vencedors an estat Maialen López e Gral Sellés, mentre qu’ena distància reina, des 42 kms, era aranesa Marta Céster a estat era guanhadora ena categoria femenina e Sadurní Betriu ena masculina.

Ena pròva i a agut participaires illustres coma era aupinista Edurne Pasaban o eth president dera Real Federación Española de Deportes de Invierno, er aranés May Peus, que non a volut perder-se aguesta cita esportiua en casa.

Des dera organizacion avaloren tanplan positiuaments era edicion d’enguan dera Marxa Beret, en tot premanir ja era edicion de 2019, qu’artenherà eth sòn 40au aniversari, ena que se demoren fòrça suspreses.

Era Marxa Beret ei era pròva esportiua mès importanta qu’a era Val d’Aran ath long der an, e un an mès s’a artenhut ua nauta participacion. De ben segur, qu’era 40au edicion d’aguesta corsa, tornarà a amassar a un pialèr de hondistes arribadi de fòrça encastres autant d’Espanha coma d’Euròpa.