Iniciada era IIau fasa deth projècte d'intervencion dera Glèisa de Montgarri

08/08/2017

Eth passat an 2016, eth Conselh Generau d'Aran comencèc ua sèrie d'òbres de melhora ena glèisa de Nòsta Senhora de Montgarri encetades damb era reabilitacion dera cobèrta dera sua cabecèra. Ues òbres qu’an entrat dejà ena dusau fasa e s’a previst qu’encara duren enquia finaus d’ostiu.

Era melhora mès remercable ei eth renauiment deth solèr, ua òbra que resultaue imprescindible entà poder eliminar era umiditat que patie eth tèrra dera glèisa.

Ua auta des accions destacables ei era eliminacion dera escala que daue accès ath còr entà restablir era seguretat des usatgèrs e deishar liure era portalada romanica d'accès.

Pendent aguesti trebalhs s’an trapat rèstes arquitectoniques dera antiga glèisa de Montgarri, ua descubèrta fòrça interessant.

Aguestes melhores se somen ara nauetat que supausen es naues imatges dera Mare de Diu de Montgarri.

Ua òbra començada peth Conselh e er archiprestat d’Aran e qu'aurà un còst de pròp 70.000 euròs, un còst necessari- pensen- entà preservar era nòsta cultura. Ues òbres de reabilitacion fòrça necessàries entà suenhar era glèisa d’un des pòbles mès emblematics deth territòri aranés.

Clara Villar