Gausac invertirà mès de 150.000€ en urbanizar eth carrèr Baricauba

15/05/2017

Eth projècte prevé milhorar era circulacion en aguest carrèr e eth batiment d'un parcatge entà 20 veïculs

Eth pòble de Gausac urbanizarà pendent aguesta primauera e er inici der ostiu eth carrèr Baricauba. Damb ua inversion de mès de 150.000€, aguesta pedania de Vielha e Mijaran, a elaborat un projècte qu’a dues parts. D’un biais, 59.000€ entà apariar er inici deth carrèr que hè pujada, damb eth bastiment de dus accessi entàs pedons e era melhora deth parcatge entà evitar que i age problèmes de transit.

Aguesta prumèra part des òbres, compde damb ua subvencion de 30.000€ per part der ajuntament de Vielha e Mijaran.Era 2au fasa, avalorada en lèu 92.000€ supause eth bastiment d’ua vintia de places de parcatge ath cant dera piscina, en tot guanhar ath tor de 5 mètres de cauçada, pr’amor dera dificultat dera circulacion en aguest parçan.

Es prepauses entà amiar a tèrme es òbres son dubèrtes enquiath 25 de mai. Es pliques se dauriràn eth dia 30 e s’adjudicaràn es òbres. Se demore qu’abantes deth mes d’agost, es trebalhs siguen prèsti, pr’amor qu’ei quan comence a vier eth torisme ath pòble de Gausac.
Manu Moga