Dejà manquen pògui dies entara dubertura d'inscripcions dera 13au edicion dera Pedals de Foc Non Stop (UCI C3), que tornarà a èster era sedença deth Campionat d'Euròpa MTB Ultramarathon e aurà lòc dissabte, 30 de junh. 

Era organizacion dejà a hèt publics es prètzi e modalitats des inscripcions d'aguesta naua edicion, ena qu'es interessats e interessades se poiràn inscríuer a compdar deth pròplèu deluns, 15 de gèr. Tanben s'an publicat dejà eth reglament e era guida tecnica. 

Ua des nauetats d'enguan ei un prumèr prètz d'inscripcion damb eth paquet basic fòrça mès economic qu'eth der an passat, de 60 euròs. Ath delà, s'a modificat eth sistèma d'inscripcion de manèra qu'es prètzi variaràn en foncion dera data ena qu'eth participant s'inscriue. 

Coma ei dejà abituau, es corredors disposaràn tanben de diferents packs damb lotjament e d'auti entà acompanhants. 

Era organizacion a modificat eth reglament de manèra que serà obligatòri qu'es corredors pòrten dessús ua manta termica, telefòn mobil e justet, ath delà des dejà abituaus GPS, lums biciclèta e es estruments basics de reposat.

Era darrèra des nauetats mès destacables ei er endarrieratge de 45 menutes deth dusau punt de talh orari, plaçat en km 160 dera carretèra C28, pròp de Sorpe, qu'enguan serà tàs 20:00 ores.