Eth pòble aranés tanben se manifèste pendent eth dia de grèva generau en Catalonha

18/10/2019

Era Val d'Aran s'a volut somar ara grèva generau catalana e a gessut en carrèr entà refusar era senténcia dictada peth Suprèm contra es liders politics catalans. Ua senténcia que, arrebrembam, dicte un totau de 100 ans de preson entre toti es condemnadi.

Era concentracion, qu'a estat organizada peth Sindicat d'Estudiants d'Aran, s'a caracterizat peth gran ambient pacifista e cordiau. Es assistents s'an amassat ena Plaça dera Glèisa de Vielha, a on s'a liejut un manifèst.

Eth Sindicat d’Estudiants dejà convoquèc era grèva des deth dimèrcles 16 d’octobre, en tot culminar-la damb aguesta darrèra concentracion.

Era manifestacion a recorrut un des principaus carrèrs de Vielha, en tot dar eth torn ara rotonda que passe pera N-230. Dempús a tornat ath punt d'amassada.

Es mossos d'esquadra an numerotat aguesta concentracion en lèu 150 assistents.

Es reaccions des manifestants, an estat clares e contundents.

Des deth Sindicat d'Estudiants d'Aran e des dera associacion Taula per Aran, diden, non descarten mès mobilizacions entà deféner era libertat d'expression e era democracia.

Laura Rodríguez