Eth Lleida Esportiu e eth Combinat dera Val d’Aran an jogat aguesta tarde un partit amistós en Camp de Fotbòl de Naut Aran en Garòs. Aguest partit ère eth 2au entàs dera Tèrra Ferma dempús d’auer jogat dimèrcles passat contra eth Tremp, mentre qu’ère eth prumèr entàs jogadors aranesi convocadi.

Des der inici deth partit s’a vist era superioritat dera equipa visitanta, non sonque pera categoria, senon per estat de forma des sòns jogadors, que se trapen a sonque uns dies de començar era sason oficiau.

Enquiara menuta 15 de partit s’a mantengut era igualtat en marcador, mès a compdar d’alavetz eth Lleida Esportiu a començat a arténher diuèrsi gòls enquia establir eth 0 a 6 ath descans.

Ambdús entrenadors s’an decidit a hèr fòrça cambis e deishar que toti es jogadors podessen jogar aguest partit. Ena 2au part, en tot auer baishat era intensitat, es de Lhèida an ampliat eth marcador enes darrères menutes enquia arribar ath 0 a 13 finau. Un resultat que non ère er objectiu principau entàs locaus, senon er hèt d’auer podut jogar contra ua equipa professionau dera 2au Division B Espanhòla.

Pera sua part, eth Lleida Esportiu començarà aguest dimenge era sua temporada oficiau en tot visitar ath Cerdanyòla ena Copa Catalonha. Era Liga la iniciaràn era dimenjada deth 19 e 20 d’agost en camp deth Badalona.