Eth Conselh inície ua sèrie d'òbres de melhora ena Glèisa de Montgarri

09/06/2017

Eth Conselh Generau d'Aran a començat ua sèrie d'òbres de reabilitacion ena glèisa de Nòsta Senhora de Montgarri.

S'està realizant un drenatge perimetral e baish paviment damb era creacion d'un hargat sanitari e, pròplèument, se plaçarà eth nau paviment, que serà de husta ena zòna a on se placen es bancs e de pèira ena rèsta deth solèr. 

Eth renauiment deth paviment s'a realizat damb er objectiu d'eliminar es barrères arquitectoniques, ja qu'ara an quedat eliminats es gradons d'entrada e es lateraus d'accès as capèles, deishant tot ath madeish nivèu. Ath delà, a partir d'ara toti es cables de megafonia e electricitat quedaràn amagats dejós deth paviment.

Ua auta des accions destacables ei era eliminacion dera escala que da accès ath còr dera glèisa entà deishar, d'aguesta manèra, liure era portalada romanica d'accès. Mès endeuant se bastirà ua escala d'accès ara tor deth campanau. 

Ath delà, entà proporcionar ua milhor vision der espaci as visitants, elements coma era batiadera seràn reubicadi.

Ues òbres qu'arriben abantes dera tradicionau romeria de Montgarri, que se celèbre eth dia 2 de junhsèga e a on centenats de persones acudissen ara glèisa de Nòsta Senhora de Montgarri.

IMATGES: CONSELH GENERAU D'ARAN
Clara Villar