Ager, 6 de mai, es Agents de Miei Ambient deth Conselh Generau d’Aran sigueren alertadi per un ramadèr de Naut Aran a qui li mancaue un cap d’ovin deth sòn ramat. Dempús de quauques ores de recerca, es agents traperen eth mardan desaparegut depredat per os. En aguest cas es indicis de depredacion i consumicion per part der os son inequivocs.

Damb aguest dejà son dus es caps de bestiar trapadi ena zòna en pògui dies damb indicis d’os pròp des rèstes. Cau rebrembar qu’era passada setmana es Agents de Miei Ambient trapèren un aute mardan consumit per os. En aqueth cas, es causes dera mòrt der animau non se podèren aclarir in situ, e es rèstes se trasladèren ara UAB entara realizacion dera necròpsia.

Eth conselhèr de Territòri, Paisatge e Gestion Ambientau, Francés Bruna, afirme que: “eth Conselh Generau d’Aran comunique es atacs d’ossi en base ara valoracion periciau efectuada, autant se son atacs verificadi coma eth d’ager, coma se encara non i a verificacion coma eth dera passada setmana” e higie que “ei incongruent d’acusar ath Conselh Generau d’Aran d’amagar era causa dera mòrt deth prumèr mardan quan sigueren es pròpris agents de Miei Ambient quia trapèren indicis d’os pròp deth cadavre der animau e qui avisèren ath ramadèr dera situacion”. En aguest sens, eth conselhèr lamentaue “es manifestacions amiades a tèrme per determinadi grops implicadi acusant ara maxima institucion aranesa de manca de transparéncia e rigor”.

Aguesta ei era epòca mès sensible en çò que tanh as atac d’ossi a oelhes. En pògues setmanes, eth Conselh Generau d’Aran meterà en marcha es agrupaments de ramats vigiladi damb pastor, a on toti es ramadèrs deth territòri pòden híger es sòns caps de bestiar. Damb aguestes mesures, eth nombre d’atacs a baishat fòrça enes darrèri ans.

Ath delà, hè dus ans s’abilitèc tanben ua linha d’ajudes entà qu’es ramaders poguen crubar parciaument eth bestiar non retornat des pastures d’ostiu ena Val d’Aran. Era major part d’aguest bestiar non pòt èster indemnizat coma atac de fauna sauvatge, ben sigue pr’amor que non s’a trapat eth cadavre o pr’amor que non s’a podut identificar era causa dera mòrt. Damb aguesta linha d’ajudes ara ramaderia en zones de montanha damb dificultats especiaus, es ramadèrs aranesi pòden recuperar part deth valor deth bestiar non retornat a causa d’atacs, meteorologia, malauties o parts, entre d’auti motius.


HÒNT: CONSELH GENERAU D'ARAN