Eth convèni renauit aguest maitin establís eth marc competenciau e territoriau des competències dera maxima institucion aranesa en matèria de sanitat, atau coma es linhes de collaboracion damb eth Departament de Salut.

“Aguest document mos balhe eth marc juridic deth traspàs dera competéncia entà qu’Aran pogue contunhar gestionant era sua sanitat de manèra autonòma, evidentament damb era collaboracion deth Departament de Salut a trauès dera Region Sanitària Naut Pirenèu e Aran”. Ath delà, era sindica a hijut qu’aguest convèni “mos mèrque ua huelha de rota en d’autes qüestions primordiaus entath govèrn deth Conselh Generau, coma son trabalhar en desvolopament d’airaus coma era salut mental o era salut publica, enes quaus Aran tanben a es competéncies”.

Pendent era amassada dera Comission Mixta e era posterior visita ar Espitau Val d’Aran, s’a podut dar a conéisher de prumèra man ath conselhèr Argimon era realitat deth modèl sanitari e sociau integrat d’Aran Salut, que prèste ua atencion centrada enes persones e qu’amasse actuacions d’atencion primària, espitalària, especializada, socionaritària e dera salut mentau e inclodís tanben ua prestacion de servicis sociaus. Un modèl pròpri e transversau que s’a demostrat eficaç ara ora d’atier es besonhs dera nòsta ciutadania.

En aguest sens, eth conselhèr Argimon a valorat positivament era apòsta present e futura dera “atencion d’integracion sociau e de salut en Aran”. En aguest sentit a rebrembat que “impulsam era Agéncia Integrada Sociau e Sanitària pr’amor qu’es besonhs de salut d’ua persona no comencen e acaben un dia e ath dia següent comencen es besonhs sociaus, senon qu’ei un contínuum”.

Pendent aguesta visita, s’an expausat tanben es besonhs mès urgents deth nòste sistèma sanitari e sociau integrat, coma era melhora e remodelacion de diuèrsi espacis der Espitau o eth renauiment d’equipaments medics e tecnologics, entà poder aufrir ua melhor atencion as persones usatgères deth nòste sistèma de salut e benèster.

Era sindica d’Aran a volut destacar: “era importáncia deth renauiment deth convèni e era visita deth conselhèr Argimon ath nòste territòri entà refortir era relacion de cooperacion entre eth Conselh Generau d’Aran e eth Departament de Salut”.


HÒNT: CONSELH GENERAU D'ARAN