Tot semble indicar qu’era Val d’Aran entrarie ena fasa 3 dera desescalada eth pròplèu deluns 8 de junh. En Catalonha, ac harie amassa damb es auti parçans dera region sanitària deth Naut Pirenèu e Aran, e damb es regions sanitàries deth Camp de Tarragona e era de Terres der Ebre. 

Ua fasa 3 ena que segontes a comunicat er executiu der Estat espanhòu, se poiren perméter es viatges entre províncies e comunitats autonòmes que se trapen ena madeisha fasa.

De moment, çò de segur ei qu’era Generalitat de Catalonha prepausarà ath Govèrn centrau era entrada dera region sanitària deth Naut Pirenèu e Aran ena darrèra fasa dera desescalada. 

Totun, des deth Govèrn d’Aran se hè ua crida ara responsabilitat e a non baishar era guàrdia en cap de moment. 

Pr’amor que tot e qu’era pandèmia ena Val a evolucionat de forma pro favorable, pendent aguesta darrèra setmana s’a informat de 5 naui contagis dempús de fòrça dies sense detectar-ne cap. 

Atau, eth totau de casi confirmadi ena Val d’Aran des der inici dera pandèmia ei de 130. D’aguesti, 95 an estat detectadi a trauès dera pròva PCR e 35 a trauès de tests serologics.