Aguest maitin, eth sindic d’Aran, Francés Boya, a mantengut ua amassada telematica damb eth president de PIMEC e PallarsActiu, Josep González, ena que s’a acordat era signatura d’un convèni entà desvolopar projèctes damb valor territoriau en Aran es Pallars Sobirà e Jussà.  En aguesta amassada an estat tanben presents era vicesindica prumèra, Maria Vergés, era conselhèra de Naues Tecnologies e Innovacion, Angelina Cases, eth conselhèr de Territòri, Paisatge e Gestion Ambientau, Francés Bruna, eth patron dera Fundacion PIMEC, José Maria Torres e era gerent de PallarsActiu, Eva Fiter, entre d’auti.

“Auem acordat era signatura d’un convèni de collaboracion entre eth Conselh Generau e PallarsActiu, mejançant eth quau se promoirà era innovacion en espaci rurau damb ues dinamiques de creishement economic que crearàn oportunitats de desvolopament locau”, afirmaue eth sindic d’Aran, Francés Boya.

Pendent aguesta amassada s’an presentat projèctes innovadors pes quaus apòsten aguesti territòris, en cas deth Conselh Generau d’Aran s’a presentat eth HUB d’innovacion de montanha, qu’enes pròplèu setmanes ei previst que sigue dejà en foncionament, e s’a convidat as vesins deth Pallars a formar part d’aguest projècte pionèr, que plaçarà Aran e es Pirenèus coma un territòri de referéncia.

Pera sua part, PallarsActiu a presentat tanben eth sòn projècte de profitament dera caça cinegetica, que permeterà gestionar e comercializar es productes carnics derivadi dera activitat dera caça d’ua forma controlada, en tot trèir profitament d’un producte de qualitat e de proximitat.

Andues institucions an mostrat auer un interès comun entà collaborar e crear ua estrategia de futur qu’impulse ara Val d’Aran e es Pallars Sobirà e Jussà entà impulsar projèctes qu’apòsten pes tecnologies e era innovacion mès tanben pera promocion des productes de proximitat e es servicis as persones.

HÒNT: CONSELH GENERAU D'ARAN