Eth pròplèu dimenge 10 de març se celèbre era 6au edicion dera Corsa dera Hemna Val d’Aran, corsa ara qu'enguan nombroses esportistes de prumèr nivèu li dan supòrt.

Entre eres, trapam as jogadores dera prumèra plantilha deth RCE Espanyol Femenin; era rider paralimpica medalha de bronze enes Jòcs Paralimpics Pyeongchang 2018, Astrid Fina, era pilòt de Trial e Enduro Campiona deth Mon de superenduro, Sandra Gómez, era alpinista Edurne Pasaban, qu'a estat era prumèra hemna ena istòria en ascendir es 14 ueitmils; e es esquiaires d'esquí de hons araneses María e Lydia Iglesias. Ath delà, tant Edurne Pasaban coma Lydia e Maria Iglesias participaràn ena 6au Corsa dera Hemna eth pròplèu dimenge.

Totes eres an gravat vidèos qu'animen a toti a apiejar es actes commemoratius deth Dia Internacionau des Hemnes e a participar ena 6au edicion dera Corsa dera Hemna, qu'ei organizada peth Servici d'Informacion e Atencion as Hemnes (SIAH) deth Conselh Generau d’Aran en collaboracion damb eth Conselh Esportiu dera Val d’Aran e era Associacion Volentaris Val d’Aran.

Es inscripcions online ja se pòden formalizar ena plana web, e es inscripcions presenciaus auràn lòc eth diuendres 8 e dissabte 9 de març de 17:00 a 20:00 ores ena sedença deth Conselh Generau d’Aran a on se poderàn apletar es dorsaus e era samarreta dera Corsa.

Eth prètz dera inscripcion ei de 3 euròs.