Esbauçament de Valarties: es òbres s'interrompen pr'amor qu'ua vesia se nègue a qu'es maquines operiguen ena sua finca

05/12/2018

Es òbres de contencion que s’estauen amiant a tèrme ena Ribèra de Valarties an agut d’èster interrompudes dempús dera negacion d’ua des vesies a qu’es maquines passèssen per ua finca dera sua proprietat. Un hèt qu’a fòrça preocupat tant ath Govèrn d’Aran coma ara societat.

Er esbauçament, qu’auec lòc eth passat 11 de mai ena Ribèra de Valarties, a estat provocant ua fòrta turbelhada enes aigües deth Garona pendent mesi. Damb er objectiu d’arturar er esbauçament d’hanga e auti materiaus, es òbres de contencion s’auien iniciat damb urgéncia.

Un aute des ahèrs en que s’i està trabalhant des deth Conselh Generau d’Aran ei eth de depurar es responsabilitats der esbauçament. Tot indique a qu’ua bossa d’aigua originèc es hèts en mai. Mès çò que s’està estudiant ei se aguesta bossa d’aigua se formèc per condicions naturaus o ben se installacions artificiaus i poderien auer intervengut.

Ua situacion qu’està afectant ara fauna der arriu Garona e qu’està provocant un grèu impacte paisatgistic. Per açò era celeritat ei clau entà dar solucion ath problèma.

Laura Rodríguez