Es Pompièrs d’Aran hestegen eth dia de Santa Barbara

04/12/2022

Coma dejà ei tradicionau cada 4 de deseme, eth Conselh Generau d’Aran a organizat aué ua jornada commemorativa entà méter en valor eth servici ara comunautat que prèste eth còs de Pompièrs d’Aran, ua hèsta qu’enguan mèrque era fin d’ua etapa e er inici de ua auta, pr’amor qu’a compdar der 1 de gèr de 2023, er airau d’emergéncies qu’eth govèrn d’Aran ven de crear, començarà a foncionar de forma autonòma, en tot gestionar era emergéncia de forma transversau ena Val d’Aran

Aué, 4 de deseme de 2022, s’a celebrat era tradicionau hèsta de Santa Barbara, patrona des Pompièrs d’Aran, ua jornada qu’a estat presidida pera sindica d’Aran, Maria Vergés, eth Major des Pompièrs, Manel Bosch, eth director generau de Prevencion, Extincion d’Incendis e Sauvament dera Generalitat, Joan Delort, e eth subdirector generau Operatiu de Bombers de la Generalitat, David Borrell.


Aguesta hestivitat a començat, coma dejà ei tradicionau, damb es tòcs de sirena e era passejada des veïculs des Pompièrs per diuèrsi pòbles dera Val d’Aran, en tot contunhar dempús damb era missa en aunor a Santa Barbara abans de dar començament ar acte institucionau, qu’a començat damb ua menuta de silenci en rebrembe as Pompièrs defunts.


Ara seguida, a auut lòc er autrejament des medalhes de “Bombers voluntaris de la Generalitat de Catalunya”, un guerdons que distingissen era trajectòria des pompièrs a qui se concedissen en foncion des ans d’antiguitat e des servicis excepcionaus realizadi. En totau, s’an concedit trenta ua medalhes as nòsti pompièrs e pompières.


Atau madeish, aué s’a autrejat tanben eth diplòma aunorific dera Generalitat de Catalunya a Joan Canalias a títol postum, coma mòstra de reconeishement a toti es sòns ans d'implicacion e compromís damb eth còs de Pompièrs d’Aran.


Enes parlaments oficiaus, era sindica d’Aran a volut destacar que: “era d’aué ei ua hèsta de Santa Barbara plan especiau, que mèrque era fin d’ua etapa e er inici de ua auta pr’amor que, a compdar der acòrd institucionau que se signèc en 2019 damb era Generalitat de Catalunya, a compdar der 1 de gèr de 2023, er airau d’emergéncies qu’eth Conselh Generau d’Aran ven de crear en sòn darrèr plen, començarà a foncionar de manèra autonòma, en tot gestionar era emergéncia de forma transversau en tot eth territòri d’Aran, çò que mos permeterà, entre d’autes causes balhar seguretat juridica ath collectiu des pompièrs volontaris, exportar coneishement o poder-mos especializar en airaus coma eth rescat en montanha o era gestion des cremes controlades”.


Peth sòn costat, eth director generau de Prevencion, Extincion d’Incendis e Sauvaments de Catalunya, Joan Delort, a metut en valor eth procés qu’a amiat era metuda en marcha des Pompièrs d’Aran e a desirat “fòrça exits en aguest viatge que començatz damb totau independéncia eth pròplèu 1 de gèr”.


HÒNT: CONSELH GENERAU D'ARAN 
Manu Moga