Es Mossos d'Esquadra detien un grop organizat especializat en panar en establiments dera Val d'Aran e dera Nauta Ribagòrça

06/11/2018

Es Mossos d'Esquadra detengueren eth passat dissabte, en Pònt de Suert (Nauta Ribagòrça), cinc persones, dues hemnes, de 29 e 37 ans, de nacionalitat romanesa e espanhòla, e tres òmes, de 44, 38 e 28 ans, de nacionalitat romanesa, toti cinc vesins de Lhèida, coma presomptius autors de quate panatòris e per apertenença a grop criminau.

Eth passat dissabte, ath torn des 22.30 ores, se produsic un panatòri en interior d’ua cafeteria de Vielha. Un grop de cinc persones, qu'actuauen de manèra organizada, profitèren un descuit entà sostrèir 60 èuros der interior d'ua bossa de man d'ua clienta.

Menutes dempús ua ciutadana denoncièc que li auien sostret era bossa de man, avalorada er uns 600 èuros, quan se trapaue ath laguens d'un restaurant dera avenguda Pas de Àrro de Vielha, fòrça pròplèu ara cafeteria a on auie succedit eth prumèr panatòri.

Deuant aguesti hèts s'inicièc un dispositiu de recèrca que permetec localizar ores dempús, en Pònt de Suert, un veïcul a on viatjauen cinc persones que coïncidien pleaments damb es descripcions que s'auien des suspèctes des panatòris.

Ath laguens deth veïcul se trapèc era bossa de man qu'acabauen de sostrèir e ua cartèra qu'auien panat pòc abans der interior d'un veïcul estacionat en Pònt de Suert.

As detenguts tanben se les acuse d'aute panatòri cometut era madeisha net en un restaurant de Bossòst.

Dera investigacion se despren qu'es detenguts hèn part d’un grop organizat que se dedique a recórrer diuèrses ciutats, en tot cercar zònes e establiments concorrudi a on pòden passar inapercebuts, entà cométer es panatòris.

Ath delà, bèri uns des detenguts ja sigueren investigadi er an passat ena Val d’Aran, en tot coïncidir damb er inici dera sason d’esquí, per ua quinzea de panatòris en bars e restaurants en tot profitar eth descuit des clients.

Es detenguts, des que quate an antecedents per delictes similars, passèren ager a disposicion judiciau deuant eth jutjat d'instruccion en foncions de guardia de Vielha.

Laura Rodríguez