Es eleccions municipaus en Bausen

15/05/2019

Eth municipi de Bausen, plaçat en terçon de Quate Lòcs, ei eth darrèr pòble aranés abantes d’entrar enes Pirenèus francesi. Damb ua poblacion d’uns 64 abitants, ei un des municipis mès petiti deth nòste país.

A ua extension de 17 quilomètres quarradi e ua nautada de 931 mètres.

Enes pròplèus eleccions es vesins de Bausen son cridadi as urnes entà escuélher bailessa o baile e dus regidors entàs pròplèus 4 ans. Enes darrères eleccions, eth grop politic d’Unitat d’Aran artenhec dus còssos e Convergéncia democratica un.

Enguan, era actuau bailessa, Veronique Fontan, se presente ara reeleccion, mès en compdes d’ana-i ena lista d’Unitat d’Aran, se presente ena lista d’Agropacion d’electors de Bausen.  

Unitat d’Aran (UA), qu’artenhèc dus regidors ena passada legislatura, apòste peth candidat Miguel García.

Pera sua part, José Antonio Barés enteste era lista de CDA, qu’artenhèc un regidor ena passada legislatura.

Aran Amassa tanben presente candidatura en municipi de Bausen, damb Alidé Sans coma prumèra dera lista.

Ara tòque demorar enquiath 26 de mai tà saber qu’ei çò qu’es abitants de Bausen decidissen.

Laura Rodríguez