Era Val d’Aran a gessut en carrèr pendent era jornada d’aguest 8 de Març, en tot reivindicar era paritat entre es òmes e es hèmnes. Vielha a acuelhut un parelh d’actes consecutius enes quaus mès de 200 persones an volut mostrar er esperit reivindicatiu dera grèva feminista en tot cercar aguesta paritat en fòrça airaus dera vida vidanta. Ena plaça dera Glèisa, s’a liejut un manifèst que, precisaments, cèrque trincar aguesta disparitat qu’encara aué dia i a entre ambdús sexes.

Ath delà, un viatge finalizat aguest acte, es mès joeni, es estudiants der Instititut d’Aran an prenut eth relèu en tot hèr ua petita marcha des dera plaça dera glèisa enquiara plaça deth Conselh Generau d’Aran en tot demanar era paritat tas generacions que ja an neishut en sègle XXI, e que son eth futur dera Val d’Aran. Ena madeisha plaça, tanben an liejut un manifèst, en tot reclamar un futur a on se pogue arténher era paritat entre òmes e hèmnes.

Era Val d’Aran a mostrat un viatge mès, qu’es sòns ciutadans son conscienti qu'en sègle XXI, es causes an d’anar per un aute camin, en que se pogue arténher qu’autant òmes e hèmnes siguen valoradi dera madeisha manèra, sense tier en compde eth sexe, senon es sues capacitats.