Era Val d'Aran, dauant deth rèpte deth rebastiment deth teishut economic

01/05/2020

Era Val d’Aran se trape damb un des rèptes mès grani dera sua istòria: eth deth rebastiment dera sua economia dempús dera crisi deth coronavirus. Era sua grana dependéncia en torisme, met ath nòste territòri en un besonh de cercar formules de cara ath futur deth sector. 

Segontes un estudi deth director dera Catedra d'Economia Locau e Regionau dera Universitat Rovira i Virgili, Juan Antonio Duro, era Val d’Aran poirie èster era comarca mès afectada economicaments de tota Catalonha. 

Aguest estudi analise er impacte dera pandèmia per comarques en foncion dera sua estructura sectoriau, damb eth punt de partida des sectors consideradi essenciaus en estat d'alarma e que son, per tant, es mens afectadi.

Des deth Govèrn d’Aran, totun, se hè ua crida ar optimisme en tot allegar eth potenciau deth nòste territòri.

A compdar deth pròplèu deluns 4 de mai se poderà començar a reactivar era economia. Atau, se poderàn daurir bèri locaus damb cita prèvia entara atencion individuau de clients, coma es perruqueries o centres d'estetica, tostemp damb mesures de seguretat. 

Tanben se permeterà era dubertura des restaurants entà que poguen aufrir minjar, mès solet entà portar a domicili. Mesures, totun, que meteràn a pròva era viabilitat des negòcis. 

Laura Rodríguez