Eth passat dimèrcles, 8 d'agost, auec lòc en Conselh Generau d’Aran era presentacion deth projècte Doctor Music Festival, que se celebrarà en Escalarre (Pallars Sobirà) es dies 12, 13 e 14 de junhsèga deth 2019.

Era direccion der hestivau a demanat era collaboracion des empresaris dera Val d'Aran entà daurir es sòns otèls pendent aguestes dates e poder acuélher es mès de 14.000 pernoctacions que se demoren deth 11 ath 14 de junhsèga deth 2019.

Pera sua part, era conselhèra de Torisme e Desvolopament Economic d'Aran, Anna Diaz, a manifestat qu’ "era Val d'Aran vò collaborar actiuaments damb aguest hestivau e, coma destinacion toristica de prumèr orde, aufrirà toti es sòns mejans entà qu'era gent gaudisque dera ampla aufèrta toristica qu'aufrís eth nòste parçan".

Eth president deth Grèmi d’Ostalaria dera Val d'Aran, Ambrós Barberà, "a arregraït ara organizacion deth Doctor Music Festival era confidança depositada enes establiments dera Val d'Aran, pr’amor qu'era projeccion internacionau serà fòrça importanta".

Neo Sala a afirmat qu'auram un pannèu de naut nivèu coma enes darrèri hestivaus qu’aueren lòc en Escalarre e a confirmat que s'an venut mès de 2.000 abonatges. Es prumèrs interessadi son majoritàriaments en Catalonha, mès era organizacion vò atrèir public deth Sud de França pera proximitat deth territòri.

IMATGE: CONSELH GENERAU D'ARAN