Pendent era darrèra dimenjada deth mes de gèr auec lòc ena Val d’Aran era celebracion dera Universitat Internacionau d'Iuèrn "Aran Me Fecit". Un cors qu’includic conferéncies e visites enes glèises e er auviatge aranés.

En aguest sens, eth cors tanben completèc eth cicle "Aran Me Fecit", que compde damb era exposicion sus auviatge Sacre aranés. Ua mòstra dera planimetría, fotografies e documentacion de 42 glèises e capèles araneses.

Aguestes sessions dera Universitat Internacionau d’Iuèrn ena Val d’Aran compdèren damb un totau de 45 alumnes.

Era organizacion deth cors anèc a cargue deth Conselh Generau d’Aran amassa damb Musèus dera Val d’Aran, diuèrses universitats e tanben entitats restacades damb er art, era arquitectura e era cultura.  

Ath delà, cau arrebrembar qu’era exposicion Aran Me Fecit se pòt campar enquiath 27 d'abriu, de deluns a dissabte de 17.00 a 20.00 ores en Sant Joan d'Arties.

Aquiu se presente er auviatge sacre aranés, des deth periòde medievau enquias nòsti dies, damb er objectiu de hèr a conéisher aguest legat. Se mòstren glèises, pòbles, bens mòbles e tradicions dera Val.  

Complèten aguesta mòstra diuèrsi objèctes des parròquies d'Aran, coma campanes, relòtges de campanau, o escultures en husta. Tanben s'i pòden veir repliques de bères òbres qu'actuauments se tròben exposades en diferenti musèus.

Atau madeish, era exposicion a permetut retornar, de manèra temporau, era talha gotica de Sant Joan Baptista ena sua glèisa originau, d'a on ne gessec a inicis deth sègle XX.