Era Sala de Contròle de Pompièrs Emergéncies en Casau recep dejà es trucades d’emergéncies dera Val d’Aran

16/05/2022

Damb era creacion e metuda en foncionament d’aguesta Sala de Contròle, eth Conselh Generau d’Aran possibilite qu’eth còs de Pompièrs d’Aran guanhe efectivitat ena gestion des emergéncies en territòri

Pendent eth dia d’aué s’a hèt era migracion deth telefòn d’atencion as emergéncies deth parc de Pompièrs de Vielha ara Sala de Contròle d’Aran (SCAran) que compòrte era atencion telefonica enes naues dependéncies de Pompièrs Emergéncies plaçades ena poblacion de Casau. 


Damb aguesta metuda en foncionament dera SCAran, Pompièrs Emergéncies hè un pas endeuant ena planificacion e coordinacion dera responsa as emergéncies en Aran que permeterà arténher era integracion deth nau modèl de gestion integrau d’emergéncies. 


“Pr’amor dera competéncia qu’er article 72 dera Lei d’Aran autrege ath Conelh Generau d’Aran en matèria de gestion des servicis d’emergéncies e proteccion civila, eth plaçament dera nòsta pròpria Sala de Contròle ère un servici fòrça de besonh entath nòste territòri”, afirme era sindica d’Aran, en tot híger que: “aguest nau servici supausarà ua major efectivitat e aproparà era gestion dera emergéncia ath territòri”. 



HÒNT: CONSELH GENERAU D'ARAN 
Manu Moga