Era 14aua edicion dera Pedals de Foc Non Stop, que tornarà a èster aguest 2019 era sedença deth Campionat d'Euròpa MTB Ultramarathon per tresau an consecutiu, a agotat es 1.000 places d'inscripcion disponibles 40 dies dempús dera sua dubertura, hèt que succedís per prumèr còp enes sòns 14 ans d'existéncia.

Entad aguesta naua edicion, que tornarà a auer coma epicentre eth cap-lòc dera Val d'Aran, Vielha, era organizacion i auie previsti diuèrsi trams d'inscripcion, atau coma packs damb lotjament e packs entà acompanhants, mès es ciclistes an arresponut coma jamès, en tot agotar totes es places disponibles sense arribar ath limit de dates establides, que s'i auie previst entath 14 de junh.

Ara se daurirà ua lista de demora entà toti aqueri que non an pogut formalitzar era sua inscripcion entre es 1.000 privilegiats.

Ad aguesti 1.000 inscriti s'ahigeràn es que participaràn damb es sues respectives seleccions nacionaus, per çò qu'eth nombre de ciclistes que fin finau preneràn er gessuda seguraments superarà aguesta chifra.

Era pròva de 213km e 6.200m de desnivèu positiu compdèc er an passat damb er preséncia de 967 participaires, çò que supausèc eth recòrd istoric enquia aué d'aguest mitica pròva de resisténcia en biciclèta de montanha que se celèbre des de 2006. Era organizacion, que tanben presentèc hè uns dies eth maillot de finisher que siguec escuelhut pes fans dera sua pagina de Facebook en votacion populara, arregraís era confidança renauida des ciclistes ena pròva e demore èster ara nautor des expectatives creades.

HÒNT: PDF NON STOP