Era 6au edicion dera corsa "Era Nocturna de Vielha" a congregat, as escures, a 650 participaires enes tres modalitats: caminada de 5 quilomètres, corsa de 5 quilomètres e corsa de 10 quilomètres.

Miguel Caballero s'emportèc er aur ena pròva des 10 mil mètres damb un temps de 34 menutes 24 segons, mentre Neus Vidal artenhec çò de madeish ena categoria femenina en 44 menutes 31 segons. Uns guanhadors que s'an mostrat fòrça satisfèts.

Per çò que tanh ara corsa de 5 km, Ramón Requesens se pugèc ath gradon mès naut deth pòdium, acompanhat dera guanhadora dera categoria femenina, Anne Senechal.

"Era Nocturna de Vielha" tanben compdèc damb era participacion dera esportista Sara Díaz, fòrça coneishuda en territòri e que hè un an patic un grèu accident quan hège ciclisme, que quasi li còste era vida. S'atrevic damb es 10 quilomètres.

Damb ua tendéncia a atrèir ua major participacion an darrèr an, aguesta competicion, que convide a gaudir des carrèrs de Vielha de net, se consagre ja coma referent des corses d'ostiu.