Era darrèra Comission d’Urbanisme, presidida peth secretari d'Abitat Urban e Territòri, a dat lum verda ath bastiment d’ua vintea d’abitatges en Arres, repartides en tres nuclèus. Era prepausa contemplaue cinc nuclèus damb 36 abitatges, mès s’a decidit retalhar-la per motius d’impacte paisatgistic.
Tanben i an agut nauetats en Era Bordeta, a on se declararàn dus nuclèus de solèr urban.

Un aute des grani punts tractadi ena Comission a estat era declaracion de solèr urban des dues naus de Sorieus, en Bossòst. Ua d’eres, ei un istoric magasèm deth centre comerciau Boya, e ena auta nau se i bastirà ua fabrica de bièra.

Ath delà, s’a aprovat eth bastiment d’un nau hangar entà pode-i sauvar mès elicoptèrs. Se demore qu’entara pròplèu primauera ja sigue operatiu.

Per aute costat, era problematica deth besonh de bastir viuendes de loguèr sociau a arribat tanben ara darrèra Comission d’Urbanisme.

En aguest sens, eth baile deth Naut Aran ja a començat a cercar terrens, en tot mercar coma nuclèus estrategics es pòbles de Salardú e Arties.

Non quede dubte de qu’aguesti mesi seràn clau entà mercar ua direccion en er ahèr deth possible bastiment de viuendes de loguèr sociau ena Val d’Aran.