Mar Menéndez Fernández, alumna de 4au d'ESO der IES d'Aran, a estat becada pera fondacion Amancio Ortega entà corsar eth prumèr an des estudis de Bachilherat enes Estats Units.

Era Fondacion Amancio Ortega concedís en tota Espanha 600 bèques e entà artenher-les ei de besonh superar requisits economics (un maximal de renda familhar) e academics (ua mieja minima de 7 en tresau d'ESO e de 8 en anglés), atau coma pròves escrites o oraus d'aguest idiòma e ua entrevista a trauès de vidèo trucada, tanben en anglés.

Mar, qu'encara desconeish tà quin estat des EEUU anarà, a manifestat que “estudiar enes Estats Units serà era oportunitat entà participar en activitats creatives coma fotografia o teatre”. Ath delà, viuerà ua experiéncia que li proporcionarà, ath delà dera immersion en ua auta cultura, ua major fluïdesa ena lengua anglesa, atau coma abiletats personaus entà desvolopar-se e créisher coma persona ath long dera vida. 

Era fondacion pague eth 100% des servicis de besonh entà realizar eth cors escolar en estrangèr: viatge, taxes d'escolarizacion e matricula en institut public, lotjament e manutencion damb ua familha d'acuelhuda, atau coma ua assegurança medicau.