Er Ajuntament de Vielha e Mijaran reactive era Escòla de Pairs e Mairs damb un cors de prumèrs auxilis e Reanimacion Cardio-Paumonar (RCP)

18/05/2022

Aguesta activitat aurà lòc eth pròplèu 31 de mai entàs 17:30, en tot èster organizada amassa damb era Escòla Mairau, era Bibliotèca Generau de Vielha e damb era collaboracion deth departament d’Aran Salut deth Conselh Generau d’Aran

Eth pròplèu 31 de mai, entàs 17:30, era Bibliotèca Generau de Vielha acuelh un cors de prumèrs auxilis e Reanimacion Cardio-Paumonar (RCP), organizat per Ajuntament de Vielha e Mijaran, amassada damb era Escòla Mairau “Era Cunhèra”, era Bibliotèca e compde damb era collaboracion deth departament d’Aran Salut deth Conselh Generau d’Aran.


Damb aguest cors, eth consistòri reactive era Escòla de Pairs e Mairs, dempús de dus ans arturada a conseqüéncia dera pandémia dera COVID-19.


Ua part deth cors ei dirigit a ensenhar e formar as pairs e mairs en matéria de prumèrs auxilis e era RCP a practicar ara mainadèra e, ua auta part, mostrarà desparièrs mecanismes que se poderàn emplegar entà guarir es herides que poguen aparéisher en cas de patir bèth tipe d’accident o en tot sagnar.


Ath delà, se lis aufrirà desparières lectures enta que poguen ampliar es coneishements sus prumèrs auxilis ara mainadèra enes prumèrs ans de vida.


Es places entà assistir a d’aguest cors son limitades. Es interessadi/es auràn de telefonar ath telefòn dera Bibliotèca Generau de Vielha (973640768) entà reservar era plaça.


Era Escòla de Pairs e Mairs siguec creada en 2016 coma espaci d’informacion, formacion, reflexion e supòrt as pairs e mairs sus aspèctes restacadi damb es foncions parentaus. Er objectiu deth consistòri ei poder establir un seguit d’activitats ath long der an, un viatge tornada era normalitat. Ath delà, a compdar d’enguan, se compde damb era estreta collaboracion dera Bibliotèca Generau de Vielha.


“Èm erosi de poder anonciar era reactivacion dera Escòla de Pairs e Mairs dera Escòla Mairau dempús de diuèrsi ans arturada a conseqüéncia dera pandémia dera COVID-19. Ara que tornam ara normalitat començam a organizar activitats, coma ei eth cas d’aguest cors de prumèrs auxilis e n’establiram mès ath long der an”, comente eth dusau tinent d’alcalde e còsso d’ensenhament de Vielha e Mijaran, Alberto López. E ahig que “s’apròpe era fin deth cors escolar, e damb aguest cors poderam aufrir as pairs e mairs totes es airines e coneishements de besonh entà actuar correctament en cas de que pendent er ostiu i age bèth tipe d’accident domestic damb era mainadèra”.


HÒNT: CONSELH GENERAU D'ARAN 
Manu Moga