Er Ajuntament de Vielha e Mijaran milhorarà er estat deth cementèri “Sant Miquèu” de Vielha, en tot ampliar eth numerò de cavòts e realizar un lauat d’imatge fòrça de besonh der equipament

17/05/2022

I aurà 18 naui cavòts, e s’amiarà a tèrme era sua reforma: se sanejaràn es murs e façades des cavòts existents, se milhoraràn es pòrtes d’accès, s’installarà un nau enlumenat

Er Ajuntament de Vielha e Mijaran realizarà ua importanta intervencion a compdar d’aguesta primauera en cementèri “Sant Miquèu” de Vielha. Ua actuacion que preten milhorar er estat actuau d’aguesta installacion, desmilhorat peth pas deth temps e des condicions climatologiques, entà qu’es usatgèrs poguen gaudir d’un espaci fòrça mès polit ja de cara ara pròplèu tardor.


Ua des accions mès subergesentes ei era ampliacion deth numerò existent de cavòts, a conseqüéncia dera contunhada demanda que se genère. En totau se bastiràn 18 naui cavòts.


Er equip de govèrn realizarà ua reforma generau fòrça importanta ath long deth cementèri. En aguest sens, se realizarà eth sanejament des murs e façades des cavòts ja existents, en tot reparar es henerècles produsides peth pas deth temps, era umiditat e es gelades en epòques heiredes. Atau madeish, se tornaràn a pintar, entà milhorar era imatge estetica. Tanben ei previst milhorar er estat des dues pòrtes d’accès ath cementèri, en tot sanejar-les e tornar-les a pintar.


D’aute biais, s’installarà un enlumenat de baisha intensitat entà qu’es familhars poguen auer ua milhor visibilitat, sustot, en epòques de mens lum solar (tardor e iuèrn), mès en tot evitar era contaminacion luminica. Ath delà, se plaçarà un sistèma d’aiguatge programat automatic damb aspersors, e que dispausarà d’un sensor de pluja, entà que pogue activar-se enes moments de manca d’aigua e non degalhar-la pendent es tempèstes, en tot milhorar era eficiéncia der emplec der aigua.


En çò que tanh as espacis transitables, s’amiarà a tèrme ua ampliacion dera zòna centrau deth cementèri, ath cant deth camin principau e des cavòts bastidi en 2004, damb eth bastiment de naui camins que permeteràn un milhor accès as cavòts. En aguest sens, tanben s’adaptaràn es camins existenti, entà que toti agen un paviment damb un acabat omogeni.


Eth pressupòst d’aguest projècte ei 177.585,02€. Eth tèrme d’execucion previst ei de 5 mesi, en tot finalizar eth pròplèu mes d’octobre, entà qu’es usatgèrs poguen gaudir des nauetats de cara ara hestiuetat de Tot Sants.


“Es òbres de milhora e ampliacion deth cementèri de Vielha qu’executaram son fòrça de besonh, pr’amor qu’aguest equipament merite un lauat d’imatge important a conseqüéncia deth pas deth temps e des condicions climatologiques e, sustot, ua reforma que permeterà milhorar era sua qualitat”, comente eth baile de Vielha e Mijaran, Juan Antonio Serrano. E ahig que “damb er aument dera poblacion tanben cau mès cavòts e, per tant, ampliaram eth numerò existent actuaument, en tot adaptar-lo ara demanda que i a”.


HÒNT: AJUNTAMENT VIELHA E MIJARAN 
Manu Moga