Er Ajuntament de Naut Aran destine mès de 100.000 èuros ath refortilhament de murs en Arties pes aiguats der an 2013

10/06/2020

Er Ajuntament de Naut Aran a iniciat era dusau fasa des accions entà refortilhar es murs deth marge der arriu Garona ath sòn pas pera poblacion d'Arties. Aguesta accion s'amie a tèrme entà garantir era seguretat des vesins d'aguest lòc, pr’amor que pendent es inondacions que i auec eth 18 de junh der an 2013 se causèren grani desperfectes ena zòna, en tot includir er esbaussament de bèri abitatges. Açò se produsic en tot cedir es murs pera fòrça der impacte des ròques e eth naut cabau d’aigua que baishaue pendent aqueth dia.

Aguestes òbres èren previstes peth consistòri des de hè ans, mès, per ahèrs administratius dera Confederacion Idrografica der Èbre, non s'an pogut concretar enquia aguest madeish an. D'aguesta forma, er ajuntament, dedicarà un pressupòst de mès de 100.000 èuros a reauçar es murs de tres punts estrategics dera poblacion d'Arties. Cadun d'eri, pujarà de nivèu entre 80 centimètres e 1 mètre e miei segontes era localizacion en qué se tròbe. En totau, s'actuarà en mès de 250 mètres ath long de tot eth marge der arriu Garona.

Eth baile deth municipi de Naut Aran, Cesar Ruiz-Canela, destaque que “èren ues òbres qu'auíem pendentes des de hège ja fòrça ans e ara fin les podem amiar a tèrme. Çò que mès mos impòrte ei era seguretat des nòsti vesins e credem que, damb aguesta accion, ara fin podem començar a barrar eth capítol d'aguest tragic dia en quau mos afectèren es aiguats d'ua manèra devastadora”.

Ena prumèra fasa, era Confederacion Idrografica der Èbre destinèc 500.000 èuros ara reabilitacion iniciau des murs entà corbir es desperfectes principaus, mès ei damb aguesta dusau fasa damb ua partida de mès de 100.000 èuros, qu'eth consistòri da per finalizada era accion. Es òbres entath auçament d'aguesti murs en marge der arriu Garona ath sòn pas pera poblacion d'Arties duraràn ath torn d'un mes.

HÒNT: AJUNTAMENT DE NAUT ARAN
Laura Rodríguez