ACTUALITAT
Er acte de coronacion des reines e dames mèrque er inici d'era Hèsta de Vielha
Dejà s’a dat eth trèt de gessuda ara hèsta grana de Vielha damb era tradicionau coronacion des reines e des dames.
Tath torn des sies e mieja dera tarde eth passavila a gessut de Mijaran damb era charanga, es shivaus e es carròsses damb es reines e es dames.
An trauessat eth centre de Vielha pera carretèra enquia arribar ar Ajuntament, a on centenats de persones les demorauen entà balhar-les era benvenguda que se meritauen.
En arribar, es reines e es dames d’aunor an pujat en balcon, entà començar er acte de coronacion.
Era reina dera hèsta, Irene Moreno, a dedicat ues paraules as vesins de Vielha des deth balcon, des d’a on, tanben, s’a liegut eth pregon dera hèsta e s’a hèt eth liurament dera placa ara penha "Dreti qu'èm cueti", encargada des actes dera Net de Penhes.
Es dances araneses, era net tematica o era baishada deth Cap dera Vila son bères des activitats que dèishen ua emprenta mès grana en programa d’era hèsta deth caplòc aranés. Ua hèsta, que arrebrembam, s’esperlongarà enquiath dimars 11 de seteme.