En 2017 es indemnizacions pes atacs des ossi costèren 21.361 €

08/02/2018

Segontes er informe oficiau, i auec 56 expdients a on se comptablizèc era pèrta de 204 caps de bestiar

Ja se coneishen es donades des indemnizacions as pagesi que s’amièren a tèrme pendent er an 2017 en çò que tanh as atacs d’ossi ena Val d’Aran. En totau, s’enregistrèren 56 expedients, enes quaus se comptabilizèren era pèrta de 204 caps de bestiar. Segontes recuelh er expedient oficiau, d’aguesti 56 expedients, 20 corresponen a ramats de transumància o a brinhons de mèu e es auti 36, a explotacions araneses. Eth còst totau d’aguesti atacs que s’an produsit, puge ara quantitat finau de 21.361 èuros. D’aguesti, 11.391 € supausen es indemnizacions as ramats aranesi, e es auti lèu 10.000 € corresponen as ramats de dehòra dera Val d’Aran.

Era màger part des indemnizacions que s’an agut de pagar pendent er an 2017 son restacadi damb era pèrta de mès de 150 caps de bestiar, en aguest cas oelhes, en atac qu’auec lòc ena Boca Sud deth Tunel de Vielha, en parçan de Molières. En tot cas, en aguest episòdi, non se podec demostrar que fin finau era mòrt de totes aguestes oelhes siguesse per atac dirècte de bèth os, o se queigueren peth malh pera pòur deuant dera presència d’aguest animau. Sonque se podec trapar es excrements der os, mès sense evidéncia clara d’auer provocat era mòrt deth bestiar.

Totes aguestes indemnizacions s’an hèt efectiues gràcies ara assegurança qu’a era Generalitat de Catalonha. Des deth Conselh Generau d’Aran negòcien entà qu’a compdar d’enguan, e dempús de veir eth retard ara ora d’amiar a tèrme es pagaments, poguen èster qui efectuen es indemnizacions.

Çò qu’ei evident, ei que damb era agropacion de ramats que s’amie a atèrme des de hè diuèrsi ans, es donades de mòrts de bestiar per atacs der os an amendrit considerablements.

Manu Moga