Dejà ei dubèrt eth concors entà licitar es òbres de reabilitacion des graderies deth camp de fotbòl de Bossòst. Ues accions de milhora que s’a previst que comencen ena pròplèu primauera e que dignificaràn un espaci tan important entath pòble, e sustot entara sua equipa de fotbòl, era Union Esportiua de Bossòst.

Aguestes reformes s’aprovèren per Ajuntament de Bossòst enes pressupòsti de 2019, damb es vòts en favor deth grop d’Unitat d’Aran e era abstencion de Convergéncia Democratica Aranesa.

Es òbres compden damb un pressupòst de 78.000 èuros. Part d’aguesta financiacion ei balhada pera Deputacion de Lhèida.

Uns sòs que non sonque anaràn destinadi ar apraiament des graderies, senon tanben des vestiaris.

Ath delà, en aguesti pressupòsti tanben se prevé melhorar e agranir eth recinte deth cementèri municipau, damb un pressupòst iniciau de 46.000 èuros.

A cargue d’ua auta subvencion de provinciau, eth consistòri recuperarà eth tram deth camin dera pista forestau de Margalida enquiara Mina. En aguest sens, se demore qu’aguesta accion convertisque eth camin de Casteret en un nau atractiu entath torisme actiu.