Bossòst barre eth cicle des hèires deth bestiar dera Val d'Aran

05/11/2018

Eth cicle des hèires deth bestiar dejà s’a barrat damb era celebracion dera darrèra, acuelhuda per Bossòst en un dia en que tanben se celebrèc era tradicionau Mongetada. Un solei ben ludent dèc era benvenguda a toti es ramadèrs que participèren ena hèira. Atau, s’i exposèren es milhors exemplars de crabes, shivaus, oelhes e vaques dauant era coriosa guardada des assistents.

Apuprètz ua vintea de ramadèrs de Bossòst e d’auti pòbles pròplèus se dèren cita en aguesta hèira deth bestiar. Ua bona desencusa entà amassar-se toti es ramadèrs e gaudir dera jornada.

Eth debat qu’a protagonizat aguesta amassada de ramadèrs non poirie auer estat un aute: er os. E justaments s’a dat era casualitat qu’eth darrèr atac de Goiat, eth prumèr des de que le cambièren eth colièr GPS, a estat ena zòna de Margalida, en Bossòst.

Damb 2.000 visitants pendent tota era jornada, aguesta hèira deth bestiar e hèsta gastronomica dera Mongetada se consagren dejà com un des grani eveniments de tardor de referéncia.

Laura Rodríguez