Aran per sa Lengua 2018: centenats de persones, ua soleta votz

30/07/2018

Centenats de persones non s'an volut pèrder era 25au edicion dera Aran pera sa Lengua, ua corsa non competitiva organizada peth collectiu Lengua Viua, en qué se reivindique era lengua aranesa.

Aguesta naua edicion a estat mercada pera senténcia deth Tribunau Constitucionau qu'anulle eth caractèr preferent der aranés. Atau, pendent aguesta jornada en qué es drapèus d’Aran non an deishat d’onejar, s’an succedit reivindicacions en favor der emplec der aranés.

Es participaires dera corsa an gescut cap ath meddia des des tres extrèmi dera Val: Les, Montgarri e eth pòrt de Vielha, en tot hèr parades enes pòbles que trauessauen.

Era mèta a estat era plaça dera Glèisa de Vielha, a on s'a liurat eth prèmi Lengua Viua ara prumèra estudianta en hèr era selectivitat en aranés, Lourdes Bruna, peth sòn coratge en deféner er aranés. Tanben se liurèc un prèmi ath guanhador deth dessenh dera camiseta dera naua edicion d'Aran per sa Lengua, a Aleix Filloy.

Jos eth lèma deth Prèmi Nobel de Literatura Frederic Mistral, “Qui ten era lengua, ten era clau”, des deth collectiu de Lengua Viua s’a arrebrembat era importància der emplec der aranés entara sua perviuença.

Entà méter punt finau en aguesta hèsta dera identitat d'Aran, eth grop occitan "Nadau" aufric un concèrt a on s'i toquèren e cantèren es cançons mès emblematiques deth territòri.

Laura Rodríguez