Ample ventalh d'activitats aguesti dies en Vielha!

07/12/2017

Er Ajuntament de Vielha e Mijaran a premanit ua agenda çò de mès complèta entath pònt de deseme en cap-lòc aranés. 

Mercats e hèires: 

Entre eth 6 e eth 10 de deseme Vielha acuelh ena Plaça dera Glèisa eth Mercat d'Artesania, que se trape dubèrt ath public de 11:00 a 14:00 e de 17:00 a 21:00 ores. 

Era Hèira der Hormatge se plaçarà ena sala polivalenta des d'aué enquia dissabte, 9 de deseme. Eth sòn orari de dubertura ei de 10:00 a 14:30 e de 16:30 a 22:00 ores. 

En darrèr lòc, aué comence en Palai d'Espòrts ua naua edicion dera Hèsta dera Lan, que finalize eth dia 9. 

Activitats culturaus: 

Diuendres dia 8 aurà lòc ena Glèisa de Mijaran eth Concèrt de Gòspel "Spirit of the New Orleans Gospel Singers". Eth prètz des entrades ei de 15 euròs anticipada e 18 en taquilha, se poderàn aquerir ena Oficina de Torisme Val d'Aran. 

Coma cada dimenjada, es amants deth cinèma poderàn gaudir d'es pellicules que se projècten ena sala Era Audiovisuau: "Coco", "La librería" e "Asesinato en el Orient Express".
Clara Villar