Amassada dera sindica d’Aran damb eth Servici d’Assisténcia Medicau Urgenta (SAMU) francés

14/01/2022

Pendent aguesta trobada, s’a parlat sus eth renauiment deth convèni de collaboracion entre eth Servici Aranés de Benèster e Salut e eth SAMU, ua cooperacion que permet melhorar en andús territòris era atencion as persones e eth tractament des emergéncies sanitàries

Era sindica d’Aran, Maria Vergés, acompanhada per representants deth Servici Aranés de Benèster e Salut (SABS), Aran Salut e Pompièrs-Emergéncies, a recebut aué a diuèrsi representants deth Servici d’Assisténcia Medicau Urgenta (SAMU) francés, damb qui an tractat ahèrs relacionadi damb era gestion conjunta des emergéncies medicaus en territòri.


Pendent aguesta amassada s’a parlat sus eth renauiment deth convèni de collaboracion entre SABS e SAMU, peth quau se deriven determinadi casi der Espitau Val d’Aran entath Centre Hospitalier Comminges Pyrénées de Saint-Gaudens e eth Centre Hospitalier Universitaire (CHU) de Tolosa. Per motius de proximitat, mantier aguest convèni supause ua grana diferéncia en tractament des emergéncies sanitàries.


“Entath govèrn deth Conselh Generau d’Aran ei un ahèr de vitau importància mantier e garantir ua estreta collaboracion damb eth SAMU francés, pr’amor qu’aguesta cooperacion mos permet melhorar era atencion as persones e eth tractament des urgéncies medicaus ena Val d’Aran, atau coma en territòri vesin”, explicaue era sindica d’Aran.


Entre d’auti ahèrs, en aguesta trobada s’a parlat tanben sus eth besonh de mantier ua estreta collaboracion deuant de situacions de catastròfes naturaus entà dar ua melhor cobertura e atencion ara ciutadania en cas de produsir-se aguest tipe de situacions.


HÒNT: CONSELH GENERAU D'ARAN
Manu Moga