Coma dejà ei tradicion, aprofitat aguest pònt de deseme, es pòbles d’Arties e Bossòst alugaràn aué es sues lums de Nadau.

En çò que tanh ath pòble d’Arties, aué tàs 17:30 aurà lòc aguesta celebracion ena quau, desenes de vesins e visitants deisharàn anar fanaus de huec ar aire ath temps que s'alugue era illuminacion de Nadau. Un moment magic que mèrque er inici d’ues dates fòrça demorades.

I aurà, ath delà un concèrt damb nadalets aufrit pera Escòla de Musica de Vielha, atau coma ua degustacion de coquilhons e champagne.

Pendent eth pònt, Arties acuelherà eth mercat de materiau d’esquí de dusau man, coma cada an.

Peth sòn costat, Bossòst alugarà tanben er enlumenat de Nadau aué tàs 18:00 en tot profitar era preséncia de visitants pendent aguesti dies hestius. D’aguesta manèra, er arbe e es carrèrs deth pòble dejà se traparàn en condicions de réber aguestes magiques hèstes.

Ua polida tradicion entà dar era benvenguda ara sason d’esquí e er iuèrn, ath delà d’èster ua perfècta excusa entà passar uns moments entà rebrembar damb era familha o amics.