Canejan se premanís entà acuélher aguest pròpleu dissabte 24 de hereuèr, ua naua edicion dera hèsta des Barbacans. Ua tradicion tanplan antiga en aguest pòble de Quate Lòcs, mès que dempús d’auer-se perdut, se tornèc a recuperar en an 2004. Es vesins deth pòble se disfrassen damb pèths, còrnes e esquères, en tot supausar era fin des hèstes de Magràs. Era gent recor es carrèrs deth pòble damb halhes entà espantar es mali esperits. Ua hèsta que maugrat desvelhar er interès de fòrça gent, encara non ei totauments complèta.

Era hèsta de Barbacans enlumène es carrèrs de Canejan damb es colors deth huec, e fin finau s’acabe en tot cremar eth pipòt de Magràs entà acabar era hèsta. Ua jornada, ena qu’es vesins son fòrça erosi de participar en ua tradicion que demoren sigue tanplan longa.

Per tant, aguest pròplèu dissabte entàs 7 deth vèspe, ètz toti convidadi a participar en ua naua edicion des Barbacans, a on i aurà hèsta pes carrèrs deth pòble de Canejan, e un sopar popular entà acabar dera milhor manèra era hèsta de Magràs d’enguan.