Era Val d’Aran se premanís entà acuélher en pògui dies ua naua edicion dera Marxa Beret d’esquí de hons, era pròva d'esquí nordic mès assolidada en país.

Enguan aguesta corsa arribe ara 40au edicion, e es pròplèus 2 e 3 d’hereuèr aumpliràn d’hondistes era pista de Beret damb corredors autant nacionaus coma deth nòrd d’Euròpa.

Eth dissabte, 2 de hereuèr, tàs 10:00 ores, se celebrarà era pròva de Sprint Salomon, qu'aguesta edicion serà tanben Campionat d'Espanha de Sprint ena modalitat de tecnica liura.

Eth dimenge 3 de hereuèr se disputarà era 40au edicion dera Marxa Beret, damb un circuit popular de 10 km ena zòna de Beret e Òrri; eth de 21 km ena zòna de Beret, Òrri e Montgarri e fin finau eth circuit de 42 km ena zòna de Beret, Òrri, Montgarri e direccion Marimanha.

Era edicion dera Marxa Beret d’enguan ei includida en calendari FIS de carrères populares, Campionat d'Espanha de Longa distància e Copa Espanha d'Esquí de hons.

Es inscripcions se pòden realizar tant per Internet, a trauès deraplana web dera corsa, enquiar 1 d'hereuèr, coma de forma presenciau ena Casa d'Acuelhuda, en Salardú, eth 2 de hereuèr.

Es inscripcions online supèren ja es 500 inscrits, çò qu’hè a pensar en ua bona participacion en aguesta edicion, rebrembam qu’era pròva cada an compde damb mès de 1.000 corredors.

Ath delà, entà commemorar aguestes 40 edicions s'a organizat ua exposicion en Salardú qu'includirà fotografies d'anteriors edicions, dorsaus e materiau restacat damb era longa istòria d'aguesta pròva d'esquí nordic.

Era Marxa Beret ei organizada peth Conselh Generau d’Aran, Baqueira Beret e er ajuntament de Naut Aran. Compde damb era collaboracion dera Associacion Volentaris Val d'Aran, Foment Torisme Val d'Aran, Deputacion de Lhèida, Ajuntament de Vielha e Mijaran, Pompièrs d'Aran, Aran Salut, Mossos d'Esquadra, INS d'Aran, ath delà dera Reau Federacion Espanhòla Espòrts d'Iuèrn (RFEDI), era Federacion Catalana d'Espòrts d'Iuèrn (FCEH) e es desparièrs patrocinadors.