500 persones en minjar d'"Era Mongetada" e 2.000 visitants pendent era jornada

07/11/2018

Excellenta afluéncia de gent ena celebracion dera setau edicion d'“Era Mongetada de Bossòst” damb mès de 500 persones en minjar de pagés e 2.000 visitants pendent tota era jornada. Un eveniment que se hè a coïncidir damb era tradicionau hèira deth bestiar en Bossòst. En aguest sens, ua cinquantia de paradetes s’installèren en pòble en tot aufrir productes de proximitat e materiaus entara ramaderia.

Coma eth sòn pròpri nòm indique, “Era Mongetada” vò méter en valor era mongeta deth territòri.

Se tracte, segons es expèrts, d'ua des melhores mongetes blanques: de pèth fòrça fina, e damb un gost qu'arrebrembe es fruts shuts. Es produccions domestiques se solien emplegar coma complement dera òlha aranesa o der estofat de montanha. Totun, s'a demostrat que s'i pòden a hèr tot tipe de plats, coma producte principau o combinat damb auti ingredients.

En marc des activitats programades en aguest dia hestiu, tanben se compdèc damb era exibicion d’un aizkolari, vengut deth País Basc. Ua activitat que resultèc plan exotica entàs espectadors.

Ath delà, es Sautarets de Bossòst completèren era programacion dera jornada en tot aufrir es sues dances tradicionaus a toti es presents ena Mongetada. Ua hèsta qu'an darrèr an s’a anat perfeccionant en tot arténher major participacion e privilègi.

Laura Rodríguez