Eth Conselh Generau d’Aran acuelhec eth passat dia 10 d’abriu era conferéncia "100 ans d'esquí ena Val d’Aran. Introduccion e arraïtzament”.

Eth prumèr contacte des aranesi damb er esquí arribe en an 1919 gràcies a tres excursionistes deth Centre Excursionista de Catalonha (CEC) que, per comanda dera Mancomunitat de Catalonha, pugen a pè e damb esquís eth Pòrt dera Bonaigua, entà repartir materiau d’esquí as aranesi en Pla de Beret, coma obsequi dera Mancomunitat as ajuntaments dera Val d’Aran.

Un d’aguesti excursionistes deth CEC, remassarie en ua cronica toti es detalhs d’aguesta expedicion. Un document gràcies ath quau podem conéisher es inicis d’aguest espòrt en país.

Des de 1919, er esquí començarie a arraïtzar ena Val d’Aran, tot e que d’ua forma fòrça primària.

Quan arribèc era guèrra civiu, fòrça joeni aranesi se vederen obligats a préner part en conflicte enes companhies d’esquiadors d’ambdús costats.

Maugrat qu’a dia d’aué gran part dera Val d’Aran viu der esquí, fòrça abantes deth dauriment dera estacion d’esquí Baqueira-Beret enes ans 60, es familhes araneses non vedien damb boni uelhs aguesta practica esportiua.

Ua conferéncia que se basèc en dar a conéisher era istòria des pionèrs der esquí ena Val d’Aran, entà poder enténer era consolidacion d'aguest espòrt que cambièc totauments era projeccion deth territòri.