Un an mès, centenats de mainatges e mainades dera Val d’Aran an podut gaudir d’ua des hèstes mès magiques e especiaus der an, coma ei era arribada des Reis d’Orient damb es tradicionaus cavaucades. Un totau de 7 pòbles deth país an acuelhut a Ses Majestats, en tot recéber fòrça mochets. En Vielha, coma mèrque era tradicion, es Reis an gessut de Gausac en tot recórrer bona part deth centre deth cap-lòc enquiara plaça dera glèisa. Ath long deth recorregut, era mainadèra demoraue damb fòrça espectacion e nerviosisme a ses majestats. Es halhes,  an acompanhat damb un long hiu de huec eth trajècte des Res d’Orient.

Un viatge arribadi deuant der ajuntament, es Reis an estat recebudi pes autoritats politiques de Vielha e Mijaran, deuant d’ua grana quantitat de gent tà sénter es tradicionaus paraules qu’aufrissen ara gent des deth balcon deth consistòri.

Dempús deth tradicionau discors, era mainadèra a podut fotografiar-se damb es Reis d’Orient ena plaça dera glèisa en tot condar quini son es sòns desirs entàd aguesta net, ena quau, mès d’un dormirà damb un uelh dubèrt, en tot demorar que ses majestats les agen amiat tot çò que lis an demanat.