Eth Sindic d’Aran, amassa damb era Conselhèra de Salut e Benèster deth Conselh e era Directora deth Servici Aranés de Benèster e Salut, an visitat dejà eth nau edifici a on se plaçaràn es servicis administratius der Espitau Val d’Aran.

Se tracte d’un projècte deth govèrn aranés peth quau, gràcies ar aquesiment d’aguesta naua infraestructura, se permetrà, en un futur, començar es següentes fases de reforma der Espitau que consistissen en desplaçament deth laboratòri e era ampliacion der airau quirurgic.

En aguest edifici adjacent ath pròpi Espitau, que peth moment encara ei en fasa d’òbres, se bastiràn diuèrses oficines, ua sala polivalenta entà realizar videoconferéncies o amassades e un espaci dedicat ar archiu.

Entà afrontar aguest projècte eth Conselh auia prevista ua inversion de miei milion d’euròs per part dera Generalitat, mès degut ara situacion ena que se trape Catalonha dempús dera aplicacion der article 155, aguest acòrd quede, peth moment, en aire.

Aguesti trebalhs son fòrça profitosi e necessaris entà un espitau que da servici, non sonque ara Val d’Aran e era gran quantitat de toristes que mos visiten, senon tanben ara rèsta de territòris pròplèus que non compden damb un servici tan complet enes sòns municipis.