Era Val d’Aran a viscut un an tanplan irregular en çò qu’a a veir damb es precipitacions e es precipitacions en forma de nhèu pendent era sason d’iuèrn. A estat ua temporada ena que non i a mancat nhèu, mès tanpòc es cèlhs an estat d’ua grana quantitat excèpte ena prumèra part deth mes de gèr a on queiguec era nheuada mès potenta de tota era sason.

Çò que demòstren es donades ei que de cada viatge era nhèu hè mens acte de preséncia enes endrets de mèns còta coma per exemple poblacions coma Vielha, a on enguan, non a nheuat coma ei d’abtiuda. Ua auta donada interessanta ei qu’en lèu toti es mesi d’iuèrn s’a registrat ua temperatura superiora as 20 grads.

En çò que tanh as acumulacions de nhèu, ena estacion de Comalada s’an artenhut lèu 5 mètres quan era mieja ei per dessús de 6 mètres. Un hèt qu’a provocat qu’eth desglaç sigue fòrça mès leugèr qu’en d’auti ans. Des deth Centre de Prediccion de Lauègi deth Conselh Generau d’Aran concreten qu’enguan sonque an auut d’amiar dus rescats de montanha per lauèg damb persones involucrades.

Era tendéncia ei que de cada viatge nhèue mens, totun nhèue pro entà que Baqueira Beret age tornat a èster un referent en tot eth territòri en tot arténher un nau record aguesta sason.