Eth Conselh Generau d’Aran amie a tèrme pendent aguesti dies es tràmits entà que pogue licitar-se era dusau darrèra fasa des òbres dera residéncia de gent grana de Les. Ara fin d’aguest mes de mai ei prevista era entrèga des trabalhs iniciaus qu’an patit un important retard pr’amor de diuèrsi imprevisti relacionadi damb es suministres de lum, gas e telefonia.

Damb era entrega d’aguesta fasa, s’amiarà a tèrme era licitacion dera darrèra part des trabalhs de besonh entà un equipament d’aguestes caracteristiques, que non èren previsti ena òbra iniciau, e que son un requeriment entà assegurar eth compliment dera normativa e eth confòrt des usatgèrs.

Aguesta darrèra fasa inclodís tanben era reforma exterior, que prevé milhorar era foncionalitat deth pati exterior des residents, en tot configurar un petit passeg en sector propèr ar arriu e un espaci d’estada ena zòna deth cant der edifici que, ath madeish temps, facilite era accessibilitat per part des veïcles d’assisténcia.  Era inversion totau ascendirà ath torn des 655.000 èuros

Era residéncia, qu’aurà ua capacitat entà 32 persones, compdarà tanben damb un centre de dia damb capacitat maxima de 25 persones que servirà entà ampliar era capacitat der actuau centre de dia plaçat en Vielha.