Era ex deputada aranesa per Lhèida dera CUP, Mireia Boya a decidit barrar era sua casa rurau, Bòrda Guilhamuc de Les, dempús d’auer arrecebut diuèrses menaces pendent es darrèri mesi.Boya presentèc ua denóncia en jutjat de Vielha contra eth director d’OK Diario, Eduardo Inda, a qui acuse de grèus perjudicis personaus arraïtz d’ua publicacion faussa sus eth sòn negòci. Segontes aguest miei de comunicacion, era Bòrda Guilhamuc serie un otèl de 5 estrelhes.

Cau rebrembar qu’aguesta bastissa siguec emplegada eth passat 1 d’octobre entà qu’es vesins de Les podessen votar en referendum convocat pera Generalitat de Catalonha.

Boya assegure que dempús d’auer-se hèt public qu’ère proprietària d’aguest establiment, arrecebèc menaces d’acupar-lo e cremar-lo, includidi diuèrsi portaus de resèrves per Internet, e qu’alavetz decidic barrar-lo ath public per pòur a que poguen logar-lo tà causar damatges.

Ath delà, Mireia Boya, eth pròplèu 14 de hereuèr ei cridada a declarar deuant eth Tribunau Constitucionau acusada de rebellion, precisaments, peth referendum der 1 d’octobre, damb d’auti politics coma era sua companha de partit Anna Gabriel.