Mès de 150 persones an votat aguest maitin en Les ena urna improvisada que s’a plaçat ena casa rurau Bòrda Guilhamuc, proprietat dera deputada dera CUP, Mireia Boya. Aguest a estat, fin finau, eth lòc qu’acuelh era votacion deth referendum en Les, dempús qu’es Mossos d’Esquadra an empedit qu’era gent entrèsse en collègi Alejandro Casona, qu’ère eth lòc oficiau tà votar.Des des 6 deth maitin, mès de 50 persones se trapauen laguens dera escòla, mès deuant dera negativa des mossos de deishar entrar mès gent en recinte, s’a decidit improvisar eth nau endret, a on s’a començat a votar dempús des 11 deth maitin. Mireia Boya e eth baile de Les, Emilio Medan se mostrauen contents per poder votar, mès tristi ath viatge, pera manèra en qué s’a agut d’escuélher eth lòc tà dipositar eth vòt ena urna.

Ena Bòrda Guilhamuc s’an constituït es meses des pòbles de Les, Bossòst e Canejan. Deuant des problèmes informatics generadi, eth registre s’a hèt de manèra electronica e manuau. Se demore que pendent era tarde contunhe en tot apropar-se mès gent de desparièrs pòbles deth parçan deth Baish Aran.