Convergéncia Democratica Aranesa dejà a realizat eth sòn 3au Congrès Nacionau. Pendent aguest eveniment s’a produsit era ratificacion de Luis Carlos Medina coma nau secretari generau dera formacion en substitucion d’Àlex Moga. Ena votacion amiada a tèrme ena sedença deth partit, Medina a estat ratificat damb 46 vòts a favor e sonque un vòt nul. Un cargue que dejà exercie de manèra provisionau pendent es darrèri dus mesi. Ath delà, s’an escuelhut ara rèsta de mèmbres dera Junta.

Un aute des airaus que s’a tractat pendent eth Congrés ei era relacion de Convergéncia Democratica Aranesa damb eth Partit Demòcrata Europeu Català, que segontes Medina ei pro bona, mès sense cap formalitat.

Es esfòrci deth partit, de cara as pròplèus mesi, segontes comente Medina, ei era comunicacion. Dus ans manquen encara entàs pròplèus eleccions municipaus e ath Conselh Generau d’Aran, e vòlen qu’era gent coneishe tot çò que se hè.

Un des airaus que non s’a tractat en aguest 3au Congrès Nacionau e que semble que per ara ei arturat, ei era possibilitat de cambiar eth nòm dera formacion. Ua decision que non se considère prioritària aué dia.